या अनुदिनीला भेट देणाऱ्या सर्व वाचकांचे मन:पूर्वक आभार.

Friday 2 March 2007

पाककृती (बि)घडवण्यासाठी टिपा

आईने तयार ठेवलेल्या कणकेच्या आईनेच योग्य तापमानाला तापवून दिलेल्या तव्यावर २ पोळ्या करणे, आईने पुरण आणि कणिक तयार करुन दिल्यावर पुरणपोळ्या करणे, दिसेल त्या भाजीत भरपूर पंजाबी मसाला घालून त्या मऊ होईपर्यंत शिजवून कोथिंबीरीने झाकून 'पंजाबी डिश' म्हणून वाढणे या 'परिपूर्ण' कार्यानुभवावर अस्मादिकांची स्वारी आत्मविश्वासाने सासरी गेली. 'स्वयंपाक काय, आपोआप जमतो. स्त्रीला जन्माला घालतानाच तिच्यात पाककलाप्रविणता हे रसायन घालून पाठवलेलं असतं.' असे काही गोड गैरसमज सोबत होतेच. हळूहळू नवी नवलाई ओसरली आणि नवऱ्याला स्वयंपाक करुन खाऊ घालून तृप्त(आणि लठ्ठ) करण्याची महत्वाकांक्षा बळावू लागली. (नव्या नवलाईत पण पाककलेला थोडाफार हातभार लावला होताच. 'कांदे चिरुन दे' म्हटल्यावर कांदे चिरुन स्टीलच्या पूजेच्या ताम्हणात ठेवले होते. शिवशिव! कोण हा भ्रष्टाकार!) तर माझ्या २ वर्षाच्या यशस्वी कारकिर्दीत केलेल्या काही हमखास पाककृती मी तुमच्यासाठी सादर करित आहे.

हां, तर आता पाहूया काही पाककृती (बि) घडवण्यासाठी काय काय करावे लागते ते.
१. धिरडे- पीठ खूप पातळ भिजवावे आणि जुनाट तव्यावर तेलाची कंजूसी करुन पसरवावे. ५ मिनीटात 'तव्याला घट्ट चिकटलेले धिरडे' ही पाककृती विनासायास तयार होते. पाककृती तव्यापासून वेगळी करण्यासाठी उलथने आणि तवा घासण्यासाठी तारेची घासणी व भरपूर साबण तयार ठेवावा.
२. कुकरची भांडी न वापरता थेट कुकरमधे पुलाव/बिर्याणी शिजवणे- काही अरसिक लोक ही पाककृती मोजून मापून पाणी घालून व्यवस्थित करतात आणि पुलाव/बिर्याणी म्हणूनच खातात. पाककृती बिघडवायला इच्छुक लोकांना आपल्या कल्पनाशक्तीला खूप वाव आहे. कुकरमधे कुकरच्या तळाचा अंदाज न घेता भरपूर पाणी घाला, भाज्या व पोषकतत्वे असलेले तांदळाचे सूप तयार! कुकरमधे जेमतेम तांदळाच्या थराला लागण्याइतके पाणी घाल आणि ४-५ शिट्ट्या करा, खाली तांदळाची खळ आणि वर कडक तांदूळ/ कच्च्या भाज्या असा दुहेरी पदार्थ तयार! याहिपेक्षा नविन आणि अपारंपारिक पदार्थ करायचा असल्यास पाणी घालायला विसरा आणि काल्पनिक ३ शिट्ट्या करा. (शिट्ट्या होणार नाहीतच, साधारण वेळेचा अंदाज घेउन त्यात ३ शिट्ट्या ऐकल्या आहेत असे समजा.)
३. पुरण- पुरणपोळ्या बिघडवणे हा एक स्वतंत्र लेखाचा भाग होऊ शकेल म्हणून सध्या अभ्यासक्रमात फक्त पुरण बिघडवणे याचा अभ्यास करुया. साधारण २ वाट्या हरभराडाळ घ्यावी. त्यात ३ वाट्या पाणी व २ वाट्या साखर(गूळ वापरु नये, पोळ्या नीट बिघडत नाहीत.) घालून मंदाग्नीवर ठेवावे आणि दूरदर्शनवर 'चार दिवस सासूचे' किंवा 'ऊ ऽऽऽऽन पाऽऽऽवसाची कथाऽऽऽऽऽऽऽ' पहायला घ्यावे. मालिका संपल्यावर येऊन पहावे. साखरेचा गोळीबंद पाक होऊन पुरण घट्ट चिकटून बसले असले तर कृती यशस्वी समजावी. टिप- या कृतीला शक्यतो घरातले बिनमहत्वाचे आणि टाकून द्यायला झालेले भांडे वापरावे. पुरण न निघाल्यास बरे पडते आणि चांगले भांडे मुद्दाम टाकल्याचा आरोपही येत नाही.
४. पातळ पालेभाज्या- हि एक सोपी आणि यशस्वी कृती आहे. पालेभाज्या करण्याआधी कुकरमधे ५ शिट्यांवर भरपूर पाण्यात शिजवून घ्याव्यात. भाजीचा रंग फिकट काळ्यावर आल्यावर आणि वास इ नष्ट झाल्यावर ती भाजी शिजवण्यासाठी योग्य समजावी. २-३ उकळ्यांवर शिजवावी. हमखास बिघडते. ही पाककृती वाढल्यावर काही उपद्रवी कुटुंबघटक 'हे नक्की काय आहे' असा प्रश्न विचारुन नाउमेद करण्याचा प्रयत्न करतील त्यांच्याकडे दुर्लक्ष करावे.
५. आमटी- फोडणी करावी. मोहरी तडतडल्यावर स्टूलावर उभे राहून वरच्या फळीवरच्या डब्यातून हळद काढण्यास घ्यावी. हळद काढून झाल्यावर ती सावकाश फोडणीत टाकावी. आता शिजलेली डाळ, मीठ इ. घालून आच मोठी करुन ठेवावी आणि आजतक वरची एखादी सनसनाटी बातमी (रमेश कुमावत, आजतक. ये खबर आप सबसे पहले देख रहे है सिर्फ आजतक पर. ऐसी और खबरो के लिये देखते रहिये आजतक इ.इ.) बघायला घ्यावी.
६. कडधान्य वर्गातील भाज्या/काबुली चणे- मोजून ८ तास भिजू द्यावे व जेमतेम पाणी टाकून ३ शिट्ट्या शिजवावे. लगेच कुकर उतरवून वाफ जाऊ देऊन वापरावे.
७. पोळ्या- यातही कर्तबगारीला भरपूर वाव आहे. कणिक शक्य तितकी घट्ट मळावी. अशाने पोळ्या लाटताना हाताला नीट व्यायाम मिळून हात सुडौल होतात. तवा जास्तीत जास्त आचेवर ठेवावा. पोळी तव्यावर टाकून फोन घ्यावा. (यासाठी मैत्रिणींचे अथवा नातेवाइकांचे सहकार्य आवश्यक आहे. त्यांना फोन करण्यासाठी वेळ देऊन ठेवावी.) फोनवर आवश्यक तेवढेच बोलावे.(काय मग? पाऊस काय म्हणतोय? चिंगी काय म्हणते? आता चालायला लागली का? तुझ्या त्या आतेमावसभावाचं लग्न ठरलं का? माझ्या नणंदेच्या जावेची दूरची भाची लग्नाची आहे. तुझ्या मावससासऱ्यांची एकसष्टी कधी आहे, पिंटूला युनिट टेस्टमधे किती मिळाले इ.इ.) खरपूस वास यायला लागल्यावर पोळीकडे वळावे. ही झाली एक पद्धत. दुसऱ्या पद्धतीत कणिक एकदम पातळ करावी व पोळ्या पारदर्शक होइपर्यंत लाटाव्यात. तवा जास्तीत जास्त आचेवर ठेवून पोळ्या भाजून घ्याव्यात. पोळ्या भाजताना लागल्यास सुरीची मदत घ्यावी.

वि. सू.- या सर्व पाककृती प्रत्यक्ष करुन यशस्वी झाल्यावर मगच इथे दिल्या आहेत. वाचकांनी प्रयोग करुन आपले अनुभव अवश्य कळवावेत.
-अनुराधा कुलकर्णी

9 comments:

Milind Phanse said...

हा हा हा!! आपली हातच्या चकल्या आपल्या लेखांइतक्याच खुसखुशीत होतात का हो?

Abhijit Bathe said...

Another good one - I wish my wife could understand Marathi and I could make her read all this stuff.
Luckily I never had to learn cooking - atleast marathi cooking and can made do with rice and all the 'punjabi dishes' that u mentioned!

BTW. after marriage - I have learnt to screw up some recepies just so that my wife doesnt 'let me cook'! haha!!

TheKing said...

Good to find this blog!

Btw, I am sure I will be a tough competition to you in innovating all the receipes :-)

Hope to read new posts from you regularly.

Anonymous said...

mhanaje mala ek jabardast pratispardhi ahe.

Prachi

Manali said...

mast lihite ga baee tu! avadale ekadam! tuza email id dena ...aani orkut var account aahe ka tuze...
me pan punyachich! pan aata navarobanbarobar US madhe aahe!
mala reply deshil ka?
aani navin lihi na ga! pls!

Anonymous said...

Mala aajach saapdala tumcha blog.. aani sagle posts wachun kadhnaar aahe... Kay sangu.. Fan zale tumchya lekhan-shailichi.. Atishay sundar.. Me ithe ektich hasat basley deskwar..Lok, kay wed-bid laagley ka asha najarene baghat aahet..

Anonymous said...

Damn good..agadi pot dukheparyant hastey.. saglech lekh khoop chhan aahet... Manmuraad hasaayla laavnaare(Except Veej)
Ya stressful life madhe ase hasaayla khoop rarely milate. Tumche Aabhar.. Asech likhaan chalu theva. Waat pahat aahe. Best luck n keep it up.

P.C.S.

Anagha Kulkarni said...

Khupach mast ga!! sagalech Lekh. Lavkarach bhetavas vattay tula. Kay sahi lihitesh. Khalkahalun hasale aahe mi. :)

Rishika said...

हसून हसून पोट दुखलं ना.. अहो काय भारी लिहिलंय.. कसं सुचतं.. पण खूप मजा आली.